19 May 2018

புத்தகமும் புதுயுகமும் : முனைவர் ச.அ.சம்பத்குமார்

நண்பர் முனைவர் ச.அ.சம்பத்குமார் அவர்களுடைய புத்தகமும் புதுயுகமும் நூலினை அண்மையில் வாசித்தேன். சிவகுருநாதன் செந்தமிழ் நூல் நிலையம் தொடர்பாக இவர் எழுதியுள்ள கும்பகோணத்தில் ஒரு அறிவு திருக்கோயில்  நூலை முன்பு வாசித்துள்ளோம். அந்நூல் ஒரு குறிப்பிட்ட நூலகத்தைப் பற்றி முழுமையாக விவாதிக்கிறது. இந்நூல் வாசிப்பு மற்றும் நூல் தொடர்பாக, ராமகிருஷ்ண விஜயம், தினமணி, புதிய தலைமுறை-கல்வி, தினமலர் போன்ற இதழ்களில் அறிஞர்கள் மற்றும் ஆர்வலர்கள் எழுதியுள்ள கட்டுரைகளைக் கொண்ட ஒரு தொகுப்பு நூலாக அமைந்துள்ளது.
கிட்டத்தட்ட தொடர்பான பொருண்மைகளில் கட்டுரைகளைத் தேர்ந்தெடுப்பது என்பது மிகவும் சிரமமானதாகும். திரு சம்பத்குமார் மிகவும் முயன்று அவ்வாறான கட்டுரைகளைத் தொகுத்து வாசிப்பு தொடர்பானவற்றிற்கு முக்கியத்துவம் தந்து, ஒரே இடத்தில் அவ்விதமான கட்டுரைகள் அமையவேண்டும் என்ற நன்னோக்கில் இந்நூலைப் படைத்துள்ளார். இந்திய நூலகவியலின் தந்தையான டாக்டர் எஸ்.ஆர்.ரெங்கநாதன் அவர்களின் 125ஆவது பிறந்த நாள் நினைவாக வெளியிடப்பட்ட இந்நூலில் கீழ்க்கண்டவை உள்ளிட்ட கட்டுரைகள் இடம்பெற்றுள்ளன. 

இளைஞர்கள் எதை வாசிக்க வேண்டும் :  இறையன்பு ஐ.ஏ.எஸ்
புத்தகங்கள் அழிவதில்லை : சா.கந்தசாமி
புத்தகங்களைத் தேடித்தேடி : தஞ்சாவூர் கவிராயர்
வாசிக்கும் சமூகமே வளரும் : த.ஸ்டாலின் குணசேகரன்
திருக்குறளும் தேசப்பிதாவும் : கவிஞர் முத்துலிங்கம்
தமிழ் இலக்கியத் தொடரடைவுகள் : வாசி
தமிழ் இலக்கியக் கலை நூல்கள் : அவினாசி முருகேசன்
உலகறியச் செய்வோம் : ப.சேரலாதன்
கற்றணைத்து ஊறும் அறிவு : பாரதிபாலன்
வாசிக்கும் பழக்கமும் நேசிக்கும் வழக்கமும் : உதயை மு வீரையன்
சுதந்திரப் போராட்டத்தில் நூலகத்தின் பங்கு 
உறுதிமொழி எடுக்கும் தருணம் : இடைமருதூர் கி.மஞ்சுளா
நூலகமும் மாணவரும் : சி.சரவணன்

மேலும் புத்தக உலகம், மின்னணு உலகம், நவீன நூலகம், தேசிய டிஜிட்டல் நூலகம், ATM நூலகம், சிங்கப்பூரில் பேருந்து நிறுத்தத்தில் நூலகம், உலகப் புத்தகத் தினக் கொண்டாட்டத்தின் பின்னணி ஆகிய கட்டுரைகளும் இடம் பெற்றுள்ளன. ஆங்காங்கே வாசிப்பின் முக்கியத்துவத்தை உணர்த்துகின்ற அரிய மேற்கோள்கள் தரப்பட்டுள்ளன. மாணவர்களுக்கு பயனுள்ள இணைய தளங்களின் முகவரிகளும் தரப்பட்டுள்ளன.

கட்டுரைகளின் தலைப்புகளை அடிப்படையாகக் கொண்டு இந்நூல் விவாதிக்கும் பொருண்மைகளை அறியமுடிகிறது. வாசிப்பு நிலையில் அகராதி, இலக்கியம், வரலாறு, இந்திய விடுதலை போன்ற  பல்துறைகளோடு தொடர்புடைய வாசிப்பு சார்ந்த இடத்தினையும் முன்னேற்றத்தினையும் இக்கட்டுரைகள் எடுத்துரைக்கின்றன. பல ஆசிரியர்களின் கட்டுரைகளை ஒரே சமயத்தில் படிக்கும்போது பற்பல புதிய கருத்துகளைத் தெரிந்துகொள்ளும் வாய்ப்பு கிடைக்கின்றது. தொகுப்பாசிரியர் அரிதின் முயன்று கட்டுரைகளை வாசகர்களின் நலனுக்காகத் தெரிவு செய்து ஒன்றுசேர்த்துத் தந்துள்ள விதம் பாராட்டத்தக்க வகையில் அமைந்துள்ளது. 

புத்தகங்கள் மூலமாக நம்மை புது யுகத்திற்கு அழைத்துச் செல்கின்ற நூலாசிரியரின் முயற்சியைப் பாராட்டுவோம். நமக்கு வாசிப்புப் பழக்கத்தை ஏற்படுத்தவும், வாசிப்பின் மீது ஆர்வத்தினை உண்டாக்கவும் அவர் எழுதியுள்ள இந்நூலை வாசிப்போம். 
11 மார்ச் 2018இல் நூலாசிரியர் எங்கள் இல்லத்தில் சந்தித்து, பௌத்த ஆய்விற்காகவும் களப்பணிக்காகவும், விக்கிபீடியாவிற்காகவும் பாராட்டியபோது

நூல் : புத்தகமும் புதுயுகமும் 
ஆசிரியர் : முனைவர் ச.அ.சம்பத்குமார் (9443677943)
பதிப்பகம் : வெங்கடேஷ் பதிப்பகம், OA2 சென்னை சாலை, வேதபவனம் தெரு, கும்பகோணம் 612 002
ஆண்டு : 2017
விலை : ரூ.50   

12 May 2018

நாலாயிர திவ்யப் பிரபந்தம் : இரண்டாம் திருவந்தாதி : பூதத்தாழ்வார்

பூதத்தாழ்வார் அருளிய இரண்டாம் திருவந்தாதியை (2182-2281) அண்மையில் நிறைவு செய்தேன். அவற்றில் சில பாடல்களைப் பொருளுடன் காண்போம். 



அடி மூன்றில் இவ் உலகம் அன்று அளந்தாய் போலும்; 
அடி மூன்று இரந்து அவனி கொண்டாய்; - படிநின்ற
நீர் ஓத மேனி நெடு மாலே! நின் அடியை
யார் ஓத வல்லார் அறிந்து?  (2182)
பூமியிலே அவதரித்து நின்ற கடல் வண்ணனான பெருமானே! முன்பு ஒரு காலத்தில் இவ்வுலகத்தை மூவடியாலே அளந்துகொள்பவன் போலே மூவடி நிலத்தை யாசித்துப் பெற்றாய்; இப்படிப்பட்ட உனது திருவடிகளை நன்றாகத் தெரிந்து கொண்டு பேசவல்லவர் யாவர் உளர்? (ஒருவருமில்லை).

திரிந்தது வெம் சமத்துத் தேர் கடவி; அன்று
பிரிந்தது சீதையை, மான் பின் போய்; புரிந்ததுவும்
பண் பள்ளி கொள்ள - அழகியதே நாகத்தின்
தண் பள்ளி கொள்வான் - தனக்கு. (2196)
கொடிய பாரதப் போரிலே தேரை நடத்திக் கொண்டு அலைந்ததும், இராமனாகத் திருவவதரித்த காலத்து மாயமானின் பின்னே சென்று பிராட்டியைப் பிரிந்து அலைச்சல்பட்டதும், தரையிலே படுத்துக் கொள்ளும்படி ஆசை கொண்டதும் (ஆகிய இச்செயல்கள் யாவும்) திருவனந்தாழ்வான் மீது பள்ளிகொண்டிருக்கும் பெருமானுக்கு ஏற்றவையோ?

சுருக்காக வாங்கிச், சுவாவி நின்று, ஐயார்
நெருக்கா முன், நீர் நினைமின் கண்டீர் - திருப் பொலிந்த
ஆகத்தான் பாதம்; அறிந்தும், அறியாத
போகத்தால் இல்லை பொருள். (2221)
கோழையானது உடலைச் சுருங்க வலித்து, உடம்பு முழுவதும் சூழ்ந்து கொண்டு நின்று (உயிர் போகும்போது கழுத்தளவிலே வந்து கூடி) நெருக்குவதற்கு முன்பே, பிராட்டி விளங்கும் திருமார்பையுடைய பெருமானுடைய திருவடிகளை நீங்கள் சிந்தியுங்கள். பகவத் விஷயத்தை அறிந்தவர்களாய் இருந்தும் அறியாதவர்களாகவே உங்களைச் செய்யவல்ல ஐம்பொறிகளால் உண்டாகும் இன்பங்களால் ஒரு பயனுமில்லை. 

கண்டேன் திருமேனி யான் கனவில்; ஆங்கு அவன் கைக்
கண்டேன் கனலும் சுடர் ஆழி; - கண்டேன்
உறு நோய் வினை இரண்டும் ஓட்டு வித்து, பின்னும்,
மறு நோய் செறுவான் வலி. (2248)
அடியேன் கனவு போன்ற சுய அனுபவத்திலே திருமேனியைச் சேவிக்கப் பெற்றேன். அப்போது அவனது திருக்கையிலே ஒளிவீசும் சுடர் மயமான திருவாழியைக் கண்டேன்; மிக்க நோய்களுக்குக் காரணமான புண்ணிய பாவங்களென்கின்ற இரு கருமங்களையும் தொலைத்துவிட்டுப் பின்னையும் ருசி வாசனைகளையும் அகன்றொழிந்தன; இவற்றைத் தொலைத்து அருளுபவனான எம்பெருமானுடைய மிடுக்கையும் காணப் பெற்றேன். 

தமர் உள்ளம், தஞ்சை, தலை அரங்கம், தண் கால்,
தமர் உள்ளும் தண் பொருப்பு, வேலை, தமர் உள்ளும்
மாமல்லை, கோவல் மதிள் குடந்தை என்பரே,
ஏ வல்ல எந்தைக்கு இடம். (2251)
பக்தர்களுடைய இதயம் - தஞ்சை மாமணிக் கோயில், சிறந்ததான திருவரங்கம், திருத்தண்கால், பக்தர்கள் தியானிக்கின்ற அழகிய திருமலை, திருப்பாற்கடல், பக்தர்கள் சிந்திக்கிற திருக்கடல்மல்லை, திருக்கோவலூர், திருமதில்களோடு கூடிய திருக்குடந்தை (ஆகிய இத்தலங்களெல்லாம்) எதிரிகளை முடிக்க வல்லவனான எம்பெருமானுக்கு இருப்பிடமென்பர். 

பின்னல் அரு நரகம் சேராமல், பேதுறுவீர்!
முன்னால் வணங்க முயல்மினோ - பல் நூல்
அளந்தானைக் கார்க்கடல் சூழ் ஞாலத்தை எல்லாம் 
அளந்தான் - அவன் சேவடி. (2272)
உடல் விழுந்த பின்பு கடினமான நரகத்தை அடையாமலிருக்கும்படிக்கு மனம் கலங்கியிருக்கும் மனிதர்களே! பலவகைப்பட்ட சாத்திரங்களினால் நிச்சயிக்கப் படுபவனும் கடல் சூழப்பட்ட பூமியையெல்லாம் அளந்த கொண்டவனுமான எம்பெருமானுடைய செவ்விய திருவடிகளை இப்போதே வணங்குமாறு செய்யுங்கள்.

எங்கள் பெருமான், இமையேர் தலைமகன் நீ!
செங்கண் நெடு மால்! திருமார்பா! - பொங்கு
பட மூக்கின் ஆயிரவாய்ப் பாம்பு அணைமேல் சேர்ந்தாய்
குடமூக்கில் கோயிலாக் கொண்டு. (2278)
சிவந்த திருக்கண்களை உடைய பெருமானே! பிராட்டியைத் திருமார்பில் உடையவனே! நித்தியசூரிகளுக்கத் தலைவனான நீ எங்களைப் பாதுகாப்பவனாய்க் கும்பகோணத் திருத்தலத்திலே கோயில் கொள்ளத் திருவுள்ளம் பற்றி, விளங்கும் படங்களையும் மூக்கையும் உடையவனும் ஆயிரம் வாயையுடையவனுமான ஆதிசேனடாகிய படுக்கையின் மீது பள்ளி கொண்டருளினாய்.

நாலாயிரத் திவ்யப் பிரபந்தம் : தொகுதி 3
உரையாசிரியர் :  முனைவர் இரா.வ.கமலக்கண்ணன்
வர்த்தமானன் பதிப்பகம், 21, இராமகிருஷ்ணா தெரு, தியாகராய நகர், 
சென்னை 600 017, முதற்பதிப்பு 2011
தொலைபேசி : 99418 63542, 90949 63125, 93806 30192, 2814 4995, 2814 0347,
43502995

இதற்கு முன்னர் நாம் வாசித்தது: முதல் திருவந்தாதி : பொய்கையாழ்வார்

பகிர்ந்துகொள்ள மற்றொரு செய்தி
திரு செந்தில்குமார் அவர்களுடன், 14 மே 2018

தமிழை நேசிக்கும் இதயத்துடன் (தஞ்சாவூர் காவல்துறை கண்காணிப்பாளர் முனைவர் த.செந்தில் குமார் அவர்களுடன்) இனிய மாலைப்பொழுது. பரந்துபட்ட அவருடைய வாசிப்பும், பேச்சும் வியக்க வைத்தன. வாழ்வியல் களஞ்சியம், அறிவியல் களஞ்சியம் உள்ளிட்ட தமிழ்ப்பல்கலைக்கழகப் பல்கலைக்கழக வெளியீடுகளின் முக்கியத்துவம், தமிழ் இலக்கியங்களை தமிழார்வத்தை இளைய தலைமுறையிடம் எடுத்துச் செல்லும் பரந்துபட்ட எண்ணம், மாணவர்களை ஊக்குவிக்கின்ற பேச்சு ஆகியவற்றில் தொடங்கி விக்கிபீடியா தொடர்பான என் பதிவுகள், பௌத்தக் களப்பணி மற்றும் ஆய்வு தொடர்பாக நல்லதொரு விவாதம். (நன்றி: திரு கரந்தை ஜெயக்குமார்)


14 மே 2018இல் மேம்படுத்தப்பட்டது

05 May 2018

சைவ சித்தாந்தத்தில் முப்பொருள் விளக்கம் : புலவர் வ.குமாரவேலு

திருவாவடுதுறை ஆதீனம் நடத்திவருகின்ற சைவ சித்தாந்த வகுப்பில் அறிமுகமானவரும், முனைவர் வீ.ஜெயபால் அவர்கள் தலைமையில் நாங்கள் செல்கின்ற கோயில் உலாவின்போது உடன் பயணிப்பவருமான திரு அ.கு.செல்வராசன், புலவர் வ.குமாரவேலு (அலைபேசி 7373276051) எழுதியுள்ள சைவ சித்தாந்தத்தில் முப்பொருள் விளக்கம் என்ற நூலினைத் தந்தார். அந்நூலை வாசிக்க அழைக்கிறேன்.

பொன்றும் உலகில் பொன்றாப் பொருள்களாக இருப்பவை இறை, உயிர், தளை (பதி, பசு, பாசம்) ஆகியன. இம்முப்பொருள்களும் சைவ சித்தாந்தத்தின் அடிப்படைக் கோட்பாடுகளாகும். இம்மூன்று பொருள்களும் எவராலும் படைக்கப்படாதவை, தோற்றமில்லாப் பொருள்கள். (ப.xviii) இந்த முப்பொருளின் விளக்கமே திருக்கோயில்களாகும். மூலவர் (பதி), நந்தி (பசு), பலி பீடம் (பாசம்) என்னும் செய்தி வழிபாட்டின் உண்மையை உணர்த்துகிறது. (ப.ix)   நூலாசிரியர் தன் பார்வையில் சித்தாந்தத்தை அணுகி முப்பொருள் விளக்கத்தினை பொது இயல், பதி இயல், பசு இயல், பாச இயல் என்ற நான்கு தலைப்புகளில் மிகவும் சிறப்பான முறையில் தந்துள்ளார். 
பொது இயலில் (பக்.1-51) சமயம், சிவனும் செந்தமிழும், செந்நெறி, சைவ நூல்கள், சைவ சமயத் தொன்மை, முப்பொருள், மெய்கண்ட சாத்திரங்கள் உள்ளிட்ட பல உள் தலைப்புகளில் விவாதிக்கிறார்.  

பதி இயலில் (பக்.52-135) பதிக்கொள்கை, குணகுணி பாவம், பதி உண்மை, பதியின் பொது இயல்பு, சிறப்பு இயல்பு, இறைவன் உண்மையும் தன்மையும், சொரூப இலக்கணம், தடத்த இலக்கணம், அருட்சத்தி இலக்கணம், சிவனும் அருளும் ஒன்றே, இறைவன் எண்குணத்தான், ஒன்றாதல், வேறாதல், உடனாதல், அவற்றுக்கான காரணங்கள், பலன்கள், இறை வடிவ நிலைகள், இறை வடிவம் என்பன போன்ற தலைப்புகளில் விவாதிக்கிறார்.

பசு இயலில் (பக்.136-194) உயிர்க்கொள்கை, உயிர்த் தோற்றுமுறை, கடவுளின் வடிவம், உயிர் உணர்த்த உணர்வது, உயிர் பெறும் மூவகை நிலை (கேவல அவத்தை, சகலாவத்தை, சுத்த அவத்தை), இவற்றில் உயிரின் சிறப்பு இயல்புகள், இறைவன் உயிர்களுக்கு அருளும் தன்மை, உயிரின் குணங்கள் போன்ற பல தலைப்புகளில் ஆராய்கிறார்.

பாச இயலில் (பக்.195-278) பாச இலக்கணம், பாசத்தின் காரணிகள், மும்மலங்களின் இயல்பு, குணம் உள்ளிட்ட பல தலைப்புகள் எடுத்துரைக்கிறார்.

தொல்காப்பியம் தொடங்கி, சங்க இலக்கியங்கள், பக்தி இலக்கியங்கள் உள்ளிட்ட நூல்களிலிருந்து தேர்ந்தெடுத்த கருத்துகள், சைவ சித்தாந்தம் தொடர்பாக முன்னர் வெளியான நூல்களிலிருந்து மேற்கோள்கள், வெளிநாட்டு மற்றும் இந்திய அறிஞர்களின் கருத்துகள் ஆகியவற்றை உரிய இடங்களில் சிறப்பான முறையில் அமைத்துத் தந்துள்ளார். கருத்திற்கு வளம் சேர்க்கும் வகையில் மேற்கோள்களைச் சிறப்பாக கையாண்டுள்ளார். சொல்லவந்த கருத்தினை, எளிமையாக அதே சமயத்தில் நுட்பமாக அனைவரும் புரிந்துகொள்ளும் வகையிலும் மனதில் பதியும் வகையிலும் தந்துள்ளார். சைவம் மற்றும் சிவனின் பெருமை தொடங்கி இக்காலத்திற்கு சைவ சித்தாந்தம் பொருந்தி வருகின்ற சூழல் வரை பரந்துபட்டு  எழுதியுள்ளார்.  

சிவசிவ, உழவாரம், நால்வர் நெறி, மணிநாதம் உள்ளிட்ட பல ஆன்மீக இதழ்களில் கட்டுரைகளையும், பல ஆய்வுக்கட்டுரைகளையும் எழுதியுள்ள இவருடைய இந்நூல் சைவ சித்தாந்தத்தினை எளிதாக நமக்கு எடுத்துக் கூறும் வகையில் அமைந்துள்ளது. ஆசிரியரின் முயற்சியைப் பாராட்டுவோம். இந்நூலை வாசிப்போம்.



27 பிப்ரவரி 2018இல் திரு அ.கு.செல்வராஜ் உடன்
நூல் : சைவ சித்தாந்தத்தில் முப்பொருள் விளக்கம் 
ஆசிரியர் : புலவர் வ.குமாரவேலு
பதிப்பகம் : மணிமேகலைப் பிரசுரம், தபால் பெட்டி எண்.1447, 7 (ப.எண்.4), தணிகாசலம் சாலை, தியாகராய நகர், சென்னை 600 017 (தொலைபேசி 24342926, 24346082, மின்னஞ்சல் manimekalaiprasuram@gmail.com)
ஆண்டு : 2016
விலை : ரூ.200   

28 April 2018

கோயில் உலா : 17 மார்ச் 2018

முனைவர் வீ.ஜெயபால் அவர்கள் குழுவினரோடு 17 மார்ச் 2018 அன்று நல்லூர், திருக்கண்ணமங்கை, நன்னிலம், திருக்கண்டீச்சரம், பனையூர், விற்குடி, கூத்தனூர், திலகைபதி, அம்பர்மாகாளம், அம்பல், திருமீயச்சூர் ஆகிய கோயில்களுக்குச் சென்றோம். மாடக்கோயில்கள், கஜபிருஷ்ட அமைப்பிலான கருவறை கொண்ட கோயில் உள்ளிட்டவை இவற்றில் அடங்கும். 

திருநல்லூர் கல்யாணசுந்தரேஸ்வரர் கோயில்
கல்யாணசுந்தரேஸ்வரர்-கல்யாணசுந்தரி (ஞானசம்பந்தர், அப்பர்) (தஞ்சாவூர்-கும்பகோணம் சாலையில் சென்று; பிரிகின்ற வலங்கைமான் சாலையில் 2 கிமீ சென்று இத்தலத்தை அடையலாம்).  எங்கள் உலாவின் முதல் கோயில். சிவ புராணம் பாடி, உலா தொடங்கியது. அழகிய மாடக்கோயில். மூலவருக்குப் பின்புறம் அகத்தியருக்குத் திருமணக்கோலம் காட்டிய கல்யாணசுந்தரர் சுதை வடிவில் உள்ளார். சற்றொப்ப இதைப் போன்ற, மூலவருக்குப் பின்னர் இறைவனும் இறைவியும் உள்ள கோலத்தை திருவீழிமிழலையிலும், வேதாரண்யத்திலும் பார்த்துள்ளோம். 



திருக்கண்ணமங்கை பக்தவத்சல பெருமாள் கோயில் 
(குடவாசல் வட்டம், திருவாரூர் மாவட்டம்) திருமங்கையாழ்வாரால் மங்களாசாசனம் செய்யப்பட்ட இக்கோயிலின் மூலவரைப் பார்த்தபோது உப்பிலியப்பன் கோயில் மூலவர் நினைவிற்கு வந்தார். கம்பீரமான, உயர்ந்த அழகான மூலவரைக் கண்டோம்.  



நன்னிலம் மதுவனேஸ்வரர் கோயில்
மதுவனேஸ்வரர்-மதுவனநாயகி (சுந்தரர்) (மயிலாடுதுறையிலிருந்து நன்னிலம் வழியாக திருவாரூர் செல்லும் சாலையில் உள்ளது. நன்னிலம் பேருந்து நிலையத்திலிருந்து திருவாரூர் செல்லும் சாலையில் அரசு மருத்துவ மனை எதிரில் செல்லும் வழியில் சென்றால் கோயிலை அடையலாம்).  
மற்றொரு அருமையான மாடக்கோயில். 



திருக்கொண்டீச்சரம் பசுபதீஸ்வரர் கோயில் 
பசுபதிநாதர்-சாந்தநாயகி (அப்பர்) (நாகப்பட்டினம்-நன்னிலம்; மயிலாடுதுறை-திருத்துறைப்பூண்டி-வழி நன்னிலம்; நாகப்பட்டினம்-கும்பகோணம்-வழி நன்னிலம் முதலிய பாதைகளில் வருவோர் நன்னிலத்துக்குள் நுழைவதற்கு முன்னாள் தூத்துக்குடி நிறுத்தம் என்னுமிடத்தில் பிரியும் பாதையில் உள்ளே சென்றால் அருகில் உள்ள கோயிலை அடையலாம்).

பனையூர் சௌந்தரேஸ்வரர் கோயில் 
சௌந்தரேஸ்வரர்-பெரியநாயகி (ஞானசம்பந்தர், சுந்தரர்) (பேரளம்-திருவாரூர் சாலையில், சன்னாநல்லூரைக் கடந்து, மேலும் சென்றால் பனையூர் கைகாட்டி உள்ளது. அக்கிளைப் பாதையில் 1 கிமீ சென்றால் கோயிலை அடையலாம். அல்லது இதே சாலையில் மேலும் சென்று, ஆண்டிப்பந்தல் என்னும் ஊரை அடைந்து, திருமருகல், நாகூர் செல்லும் பாதையில் திரும்பி கோணமது என்னுமிடத்தில் இடது புறமாகத் திரும்பிச் செல்லும் குறுகலான கிளைப்பாதையில் 1 கிமீ சென்றால் இக்கோயிலை அடையலாம்). பனை மரம் இத்தலத்தில் உள்ளது. பனை மரத்தை தலமரமாகக் கொண்ட, பஞ்ச தலங்களில் இதுவும் ஒன்று  பனை மரத்தைத் தலமாகக் கொண்ட கோயில்கள் : வன்பார்த்தான் பனங்காட்டூர், திருப்பனந்தாள், திருப்பனையூர், திருவோத்தூர், புறவார் பனங்காட்டூர். இவை பஞ்ச தல சேத்திரங்கள் எனப்படுகின்றன)


திருவிற்குடி வீரட்டானேஸ்வரர கோயில்
வீரட்டானேசுவரர்-பரிமளநாயகி (ஞானசம்பந்தர்) (பேரளம்-திருவாரூர் சாலையில், ரிமளநாயகி (ஞானசம்பந்தர்) (மயிலாடுதுறை-திருவாரூர் சாலையில் வெட்டாறு தாண்டி, கங்களாஞ்சேரிக்குப் பிரியும் வலப்புறப் பாதையில் திரும்பி, நாகூர்-நாகப்பட்டினம் சாலையில் சென்று விற்குடி புகை வண்டி நிலையத்தைத் தாண்டி (ரயில்வே கேட்) விற்குடி அடையலாம்). சிவனின் அட்டவீரட்டத்தலங்களில் இதுவும் ஒன்றாகும். அட்டவீட்டத்தமூலவர் சன்னதிக்கு வலது புறம் ஜலந்தரவதமூர்த்தி உள்ளார்.

கூத்தனூர் சரஸ்வதி கோயில்
மயிலாடுதுறை திருவாரூர் சாலையில் பூந்தோட்டம் அருகேயுள்ளது. தமிழகத்தில் சரஸ்வதிக்கு உள்ள ஒரே கோயில் என்ற பெருமையைப் பெற்றுள்ளது. சுமார் 40 வருடங்களுக்கு முன்பு சென்றபோது சரஸ்வதியை அமைதியாக நின்று வழிபட்டு வந்த அந்த நாள் நினைவிற்கு வந்தது. இப்போது கோயிலுக்குச் செல்லும் வழியில் எங்கு பார்த்தாலும் கடைகளைக் கண்டோம்.

திலதைப்பதி முத்தீஸ்வரர் கோயில் 
முத்தீஸ்வரர்-பொற்கொடிநாயகி (ஞானசம்பந்தர்) திலதர்ப்பணபுரி, திலதைப்பதி, செதலப்பதி, சிதலைப்பதி என்று அழைக்கப்படுகின்ற ஊர். (மயிலாடுதுறை-திருவாரூர் சாலையில் பூந்தோட்டம் வந்து, அரிசிலாற்றுப் பாலத்தைக் கடந்து, வலப்புறமாகப் பிரியும் கும்பகோணம்-நாச்சியார் கோயில் சாலையில் சென்று கூத்தனூரை அடைந்து அங்கிருந்து செல்லலாம்). 



ஆதிவிநாயகர் கோயில்
முத்தீஸ்வரர் கோயிலுக்கு அருகே ஆதிவிநாயகர் கோயில் உள்ளது. அங்குள்ள சிற்பம்  தும்பிக்கையில்லாமல், வலக்கால் தொங்கவிட்டு, இடக்கால் மடித்து, இடக்கையை இடக்காலின்மீது வைத்து வலக்கை சற்று சாய்ந்த  அபய கரமாக காணப்படுகிறது. இவரைப் பார்ப்பதற்கு அய்யனார் உள்ளார். ஆனால் ஆதி விநாயகர் என்று வழிபடுகின்றனர்.
 அம்பர் மாகாளம் 
மாகாளேஸ்வரர்-பட்சநாயகி (ஞானசம்பந்தர்) (மயிலாடுதுறை-திருவாரூர் சாலையில் பேரளம் தாண்டி, பூந்தோட்டம் சென்று அங்கு கடைவீதியில் காரைக்கால் என்று வழிகாட்டியுள்ள இடத்தில் இடப்புறமாகச் சென்று ரயில்வே கேட்டைத் தாண்டி நேரே அச்ச்லையில் சுமார் 4 கிமீ சென்றால் கோயிலையடையலாம்).
அம்பல் பிரம்மபுரீஸ்வரர் கோயில்
பிரம்மபுரீஸ்வரர்-பூங்குழலம்மை (ஞானசம்பந்தர்) மற்றொரு மாடக்கோயில். (அம்பர் பெருந்திருக்கோயில் என்றழைக்கப்படுகின்ற இக்கோயில் அம்பர் மாகாளத்திலிருந்து அதே சாலையில் மேலும் 1 கிமீ தூரத்தில் அமைந்துள்ளது).



மீயச்சூர்  மேகநாதர் கோயில்
மேகநாதர்-லலிதாம்பாள் (ஞானசம்பந்தர்) (மயிலாடுதுறை-திருவாரூர் சாலையில் பேரளம் வந்து, இடப்புறமாகப் பிரிவும் காரைக்கால் பாதையில் செல்லாமல், வலப்புறமாகத் திரும்பும் திருவாரூர்ச் சாலையில் திரும்பிச் சிறிது தூரம் சென்றதும், கடை வீதியில், கடைவீதிக்கு இணையாகப் பின்புறம் பிரிந்து செல்லும் கம்பூர் பாதையில் சென்று ரயில்வே கேட்டைத் தாண்டி சுமார் 2 கிமீ சென்றால் மீயச்சூரை அடையலாம்).  இக்கோயிலிலுள்ள சேத்திரபுராணேஸ்வரரைப் பார்க்க பல வருடங்களாக ஆசைப்பட்டேன். அந்த ஆசை இந்த பயணத்தின்போது பூர்த்தியானது. 



மீயச்சூர் இளங்கோயில்
சகலபுவனேஸ்வரர்-மேகலாம்பிகை (அப்பர்) மீயச்சூர் மேகநாதர் கோயிலின் வடக்குப் புறத்தில் இக்கோயில் அமைந்துள்ளது.  கோயிலுக்குள் கோயிலாக உள்ள இக்கோயில் எங்கள் பயணத்தின் நிறைவாக அமைந்தது.

கோயில் உலாவின் நிறைவாக, பயணத்தில் சென்ற கோயில்களைப் பற்றிய பெருமைகளை முனைவர் வீ.ஜெயபால் எங்களுடன் பகிர்ந்துகொண்டார். வழக்கம்போல ஒரு மறக்கமுடியாத அனுபவம்.


நன்றி
எங்களை உலா அழைத்துச்சென்ற சித்தாந்த வித்தகர் முனைவர் வீ.ஜெயபால் அவர்களுக்கும், உடன் வந்தோருக்கும் நன்றி. முனைவர் வீ.ஜெயபால் தலைமையில் கலந்துகொண்டோர் திரு வேதாராமன், திரு வர்ணம் சுகுமார், நெய்வேலி திரு வெங்கடேசன், நெய்வேலி திரு செல்வம், பிஎஸ்என்எல் திரு சச்சிதானந்தம், பிஎஸ்என்எல் திரு மணிவாசகம், திருமதி செல்வராசன், முனைவர் ஜம்புலிங்கம், திரு கே.ஜே. அசோக்குமார், திருமதி மனோரஞ்சிதம், திருமதி கௌரி 



துணை நின்றவை
  • வீ.ஜெயபால், சைவ நால்வரால் பாடல் பெற்ற திருத்தலங்கள், சைவ சித்தாந்த ஆய்வு மையம், 28 அம்மையப்பா இல்லம், கோவிந்தராஜ் நகர், சீனிவாசபுரம் விரிவாக்கம், தஞ்சாவூர் 613 009, டிசம்பர் 2014
  • சிவ.ஆ.பக்தவச்சலம், தேவாரத் திருத்தலங்கள் வழிகாட்டி, குடியேற்றம், வேலூர் மாவட்டம், 2005
  • பு.மா.ஜெயசெந்தில்நாதன், திருமுறைத்தலங்கள், வர்த்தமானன் பதிப்பகம், சென்னை, 2009 

21 April 2018

சமயபுரம் போஜீஸ்வரர் கோயில் : நவம்பர் 2017

27 நவம்பர் 2017 அன்று முதுமுனைவர் குடவாயில் பாலசுப்பிரமணியன் மற்றும் திரு மணி.மாறன் ஆகியோருடன் போஜீஸ்வரர் கோயில் என்றழைக்கப்படுகின்ற போசளேஸ்வரர் கோயிலுக்குச் சென்றேன். நவம்பர் 2017 கோயில் உலாவின்போது பிற கோயில்களுடன் இக்கோயிலுக்குச் செல்லும் வாய்ப்பு கிடைத்தது. 

ஆனந்தவல்லி சமேத போஜீஸ்வரர் கோயில் ச.கண்ணனூர் (சமயபுரம்), மண்ணச்சநல்லூர் வட்டம், திருச்சி மாவட்டத்தில் அமைந்துள்ளது. போஜராஜா கோயில் என்றால்தான் இங்குள்ளவர்களுக்குத் தெரிகிறது.  ச.கண்ணனூர் புது ஆற்றங்கரைக்கு வட பகுதியில் அமைந்துள்ள ஊராகும். 
ராஜகோபுரம் இன்றி அமைந்துள்ள இக்கோயிலின் முகப்பினைக் கடந்து உள்ளே செல்லும்போது பலிபீடம், நந்தி மண்டபம் காணப்படுகின்றன. வலது புறம் அமிர்தமிருத்ஞ்சயன் (சிவன்) உள்ளார். முன் மண்டபம், ராஜகோபுரம், கருவறையைக் கொண்டு மூலவர் சன்னதி அமைந்துள்ளது.



மூலவர் போஜீஸ்வரஸ்வாமி என்றும் போஜராஜஸ்வாமி என்றும் அழைக்கப்படுகிறார். திருச்சுற்றில் மடப்பள்ளி, நந்தவனம், விநாயகர் சன்னதி,முருகன் சன்னதி, நவக்கிரக சன்னதி ஆகியவை உள்ளன. மூலவர் கருவறையின் இடது புறம் அம்மன் சன்னதி உள்ளது.  இங்குள்ள அம்மன் ஆனந்தவள்ளி ஆவார்.  





பல வருடங்களுக்குப் பின் அண்மையில் திருப்பணி ஆனதாகத் தெரிவித்தனர். மண்டபத் தூண்களின் சிற்ப அமைப்பு பார்ப்பதற்கு மிகவும் அழகாக இருந்தது. 

இந்தக் கோயில் ஹொய்சல மன்னர்களால் கி.பி.13ஆம் நூற்றாண்டில் அதாவது கி.பி.1253இல் பூஜிக்கப்பட்ட கோயிலாகும். மைசூரைச் சேர்ந்த துவாரசமுத்திரத்தைத் தலைநகராகக் கொண்டு வாழ்ந்த ஹொய்சல மன்னர்களில் இரண்டாவது நரசிம்மன் என்பவன் 13ஆம் நூற்றாண்டில் தமிழ்நாட்டில் சோழனுக்கு உதவியாக வந்து பகைவரை விரட்டி சோழனைப் பட்டத்தில் நிறுத்தினான். இவனுடைய புதல்வனாக வீர சோமேஸ்வரன் தன் ராஜ்யத்தைத் தமிழ்நாட்டில் நிலைநிறுத்தக் கருதி கி.பி.1253இல் கண்ணனூரை தலைநகரமாக்கி விக்கிரமபுரம் என்ற புதிய பெயரைக் கொடுத்தான். ஹொய்சல மன்னர்களில் இவனே புகழ் வாய்ந்தவன். இவன் கர்நாடக தேசத்துக்குச் சந்திரன் என்ற பட்டத்தைப் பெற்றான். இவன் தன் வெற்றிக்கறிகுறியாக  இந்த நகரத்திலிருந்து ஒரு சூரிய கிரகணத்தன்று  (1.3.1253இல்) பல கிராமங்களைத் தானங்களைச் செய்துள்ளான். இவனைப் பற்றிய கல்வெட்டுகள் ஸ்ரீரங்கம் கோயிலிலும், திருவானைக்கா கோயிலிலும் உள்ளன. இவன் கண்ணனூரில் பொய்சலேசுவரம் என்னும் கோயிலைக் கட்டுவித்தான். வீரசோமேஸ்வர தேவன் கண்ணனூரில் ஒரு சிவன் கோயிலைக் கட்டுவித்து அதற்கு பொய்சலேசுவரம் என்று பெயரிட்டான். அக்கோயில் தற்போது போஜராஜா கோயில் என்று வழங்கப்படுகிறது. (கோயிலுள்ள அறிவிப்புப் பலகை) 

இக்கோயிலில் சுபகிருது வருடம் ஆவணி மாதம் 21ஆம் நாள் 6 செப்டம்பர் 1962 அன்றும், துர்முகி வருடம் மாசி மாதம் 21ஆம் நாள் 5 மார்ச் 2017 ஞாயிற்றுக்கிழமை அன்றும் குடமுழுக்கு நடைபெற்றதற்கான கல்வெட்டுகள் உள்ளன.

கோயிலுக்குச் சென்றுவந்தபின் இக்கோயிலைப்பற்றி விக்கிவீடியாவில் புதிய பதிவு ஆரம்பித்தேன். திருப்பணிக்குப் பின் வடிவம் பெற்றுள்ள, இக்கோயிலுக்கு வாய்ப்பு கிடைக்கும்போது செல்வோம்.

14 April 2018

காக்கப்பட வேண்டிய கலைப்பெட்டகம் : கும்பகோணம் அரசு கலைக்கல்லூரி (2)

எனக்கு அதிசயத்தையும் ஆச்சர்யத்தையும் கொடுத்தது அவ்வறையில் காணப்பட்ட ஒரு குறிப்பு. அழகாக பராமரிக்கப்படுகின்ற அறையின் வாயிற்கதவின் மேல் ஆங்கிலத்தில் ஸ்ரீனிவாச ராமானுஜன் படித்த அறை என்று பொருள்படும்படி காணப்பட்ட குறிப்பே அது. நாங்கள் படித்த காலத்தில் இவ்வாறான குறிப்பு காணப்படவில்லை. இந்த அறையைப் பற்றி இது தொடர்பாக எதுவும் பேசப்படவில்லை. புகுமுக வகுப்பு படித்த காலகட்டத்தில் இதற்கு அடுத்த அறையில் நண்பர்களின் வகுப்பறை இருந்ததால் பல முறை இந்த அறையின் வழியாக சென்றது நினைவிருக்கிறது. இதையொத்த பல அறைகளுடன் ஒப்புநோக்கிய போது இந்த அறையின் சிறப்பான பராமரிப்பிற்கான காரணத்தை இப்போது அறிய முடிந்தது. தன் தளத்தில் திரு கரந்தை ஜெயக்குமார் இதன் பெருமையைப் பகிர்ந்துள்ளார். 
அடுத்து பார்க்கும்போது அந்த அறைக்கு வெளியே கணித மேதை ராஜமானுஜன் கல்விபயின்ற வகுப்பறை என்ற குறிப்பு தமிழிலும் ஆங்கிலத்திலும் காணப்பட்டது. அப்போது தெரியாவிட்டாலும் இப்போது தெரிந்ததே என்ற மகிழ்ச்சி மனதில் ஏற்பட்டது. கணித மேதை படித்த அறையின் அடுத்து நான் படித்த வகுப்பறை இருந்ததை எண்ணிப் பெருமைப்பட்டுக்கொண்டேன்.  
அப்பகுதியில் ஒன்றோடோன்று இணைந்துள்ள நிலையில் அமைந்துள்ள வகுப்பறைகளின் அமைப்பு படிப்பதற்கான ஒரு சூழலையும் மனதில் அப்போது ஏற்படுத்தியிருந்ததை உணர முடிந்தது.   



வாயிலில் காணப்பட்டது போன்றே இப்பகுதியிலும் தூண்களிலும் உத்தரங்களின் தாங்கு பலகைகளிலும் மிக அழகான மரச் சிற்பங்கள் உள்ளதைக் காண முடியும். அடுக்கடுக்காக வரிசையாக அமைக்கப்பட்டுள்ள மர உத்தரங்களின் அழகு கட்டடங்களின் கம்பீரத்தை எடுத்துரைப்பதைக் காண முடியும்.   
வாயிலின் காணப்பட்ட தூண் சிற்பங்கள் இங்கும் தொடர்கின்றன. அதாவது மணிக்கூண்டின் தரை தளத்தின் இரு புறமும் இவ்வாறான தூண்கள் அமைந்துள்ளன. அவற்றின் நேர்த்தியும் பிற எவற்றுடனும் ஒப்பிட முடியாத அளவிற்கு இருப்பதைக் காணலாம்.  
காலனிடமிருந்து மார்க்கண்டேயரைக் காப்பாற்றுகின்ற (லிங்கத் திருமேனிக்கு மேலே காணப்படுகின்ற) சிவபெருமான், குடந்தைக்கிடந்தான் என்று ஆழ்வார்களால் பாடப்பெற்ற பாம்பணையில் அனந்த சயனத்தில் கிடக்கின்ற பெருமாள், லிங்கத்திருமேனியைப் பூசிக்கின்ற பிரம்மா உள்ளிட்ட பல மரச் சிற்பங்கள் அங்கு காணப்படுகின்றன. (சிற்பத்தின் அருகே வைக்கப்பட்டுள்ள பேனாவின் அளவினைக் கொண்டு சிற்பத்தின் அளவைக் கணக்கிட்டுக் கொள்ளலாம்.)
மார்க்கண்டேயரைக் காப்பாற்றுகின்ற சிவபெருமான்
அனந்த சயனத்தில் பாம்பணையில் பெருமாள்

லிங்கத்திருமேனியைப் பூசிக்கின்ற பிரம்மா
அருகேயுள்ள மற்றொரு வகுப்பறையில் எங்களுக்கு இரண்டோ, மூன்றோ சிறப்பு வகுப்புகள் நடைபெற்றன. முன்புறம் அரை வட்ட வடிவத்திலும் தொடர்ந்து செவ்வகமாகவும் உள்ள இந்த அறையின் மேற்பகுதியில் பால்கேனி போன்ற அமைப்பு காணப்படும். ஆசிரியர் நிற்கின்ற (அரை வட்ட வடிவப் பகுதி) பகுதியில் மாடிப்படிகள் காணப்படும். இதன் வழியாக ஏறி ஒரு சுற்று சுற்றி வந்தால் கீழே நடக்கும் வகுப்பினை நன்கு காண முடியும். வகுப்பு நடைபெறாதபோது நாங்கள் மேலே ஏறி பார்ப்பது வழக்கம்.

பால்கேனியுடன் கூடிய வகுப்பறை
இவ்வறையினை அடுத்துச் சிறிது தூரம் சென்றால் மற்றொரு வகுப்பறை காணப்படும். இந்த வகுப்பறையில் நாங்கள் படிக்கவில்லையென்றாலும் பார்த்ததுண்டு. இந்த வகுப்பறையின் கடைசி இருக்கைகள் மிக உயரத்தில் காணப்படும். விளையாட்டு மைதானத்திற்கு அருகே உள்ள இந்த வகுப்பறையில் தொடர்ந்து படிப்படியாக கீழே இறங்கிய நிலையில் பார்க்க அழகாக இருக்கும். ஆசிரியரின் பார்வையில் அனைத்து மாணவர்களும் முழுமையாகப் படும்படி சரிந்த நிலையிலான தரையில் மேசைகள் காணப்படும். இக்கல்லூரியில் இவ்வாறாக வித்தியாசமாக அமைந்த அறை இது ஒன்று மட்டுமேயாகும். 
வித்தியாசமான இருக்கை அமைப்பு கொண்ட வகுப்பறை
ஒவ்வொரு அறையாகப் பார்த்துவிட்டு முதல்வர் அறை அமைந்துள்ள கட்டடத்திற்கு வந்தேன். இக்கட்டட வராந்தாவில்தான் புகுமுக வகுப்பு சேரும் நாளன்று அதிக நேரம் காத்திருந்தது நினைவிற்கு வந்தது. 

அக்கட்டடத்தின் நடுவில் அமைந்துள்ள மாடிப்படிகளின் வழியாக இடது புறம் வழியாகச் சென்றால் நாங்கள் பொருளாதாரம் இரண்டாம் ஆண்டு படித்த வகுப்பறையைக் காணலாம். முதல் தளத்தில் அமைந்துள்ளது. வகுப்பு முடிந்தபின்னரோ, வகுப்பு மாறும்போதோ இந்தப் படிகளின்வழியாகத் தான் வருவோம்.

அத்தளத்திலிருந்து எதிரே அமைக்கப்பட்டிருந்த ராமானுஜன் சிலையைப் பார்த்தோம். அதற்குப் பின் புறம் பல புதிய கட்டடங்கள் காணப்பட்டன. நாங்கள் படித்தபோது இவையனைத்தும் இல்லை.  
தொடர்ந்து அப்போது அறை எண்.44 ஆக இருந்த அறைக்குச் சென்றோம். அக்காலகட்டத்தில் இங்குதான் ஆண்டு விழாக்களும், இலக்கிய விழாக்களும் நடைபெற்றன. 

அங்கிருந்து கல்லூரியின் நூலகத்திற்குச் சென்றோம். நூலகத்தின் முன்பாக இப்போது அதிகமான மரங்களைக் காணமுடிந்தது. கல்லூரிக்காலத்தில் நூலகத்திற்கு அரிதாகவே சென்றுவந்துள்ளேன். 
கல்லூரியின் நூலகம்
நூலகத்தின் இடது புறத்தில் நாங்கள் படித்த புகுமுக வகுப்பறை இருந்தது. அதனையும் இப்போது பார்த்தேன்.  புகுமுக வகுப்பில் 1975இல் அளவையியல் (Logic) என்ற பாடத்தை நான் படிக்கும் வாய்ப்பு கிடைத்தது. அப்போது ஒரு தளம் மட்டுமே இருந்ததாக நினைவு. கல்லூரியில் சேர்ந்தபின் முதல் நாள் முதல் வகுப்பு எங்களுக்கு இந்த அறையில்தான் ஆரம்பமானது. பிற பாடங்களுக்காக அவ்வப்போது பிற வகுப்பறைகளுக்குச் செல்ல வேண்டியிருக்கும். இளங்கலை பொருளாதாரம் படிக்கும்போதும் இந்த முறை தொடர்ந்தது. ஆகையால் கல்லூரியில் பல வகுப்பறைகளில் அமர்ந்து படித்த அனுபவம் இருந்தது.
புகுமுக வகுப்பறை அமைந்திருந்த கட்டடம்
புகுமுக வகுப்பறையின் வெளியே, நூலகத்தைக் கடந்து வந்தபோது எதிரில் இருந்த குளத்தைக் கண்டோம். நாங்கள் படித்தபோது இக்குளத்தில் எப்போதும் தண்ணீர் காணப்படும். இப்போது தண்ணீர் காணப்படவில்லை. சிறிது நேரம் குளக்கரையில் நின்றுவிட்டு கல்லூரியின் பின் புற வாயிலுக்குச் சென்றோம். 


அங்கு நண்பர் மணிவண்ணனுடன் நின்று புகைப்படம் எடுத்துக்கொண்டு, கல்லூரி பற்றிய நினைவுகளை பரிமாறிக்கொண்டு அங்கிருந்து புறப்பட்டேன்.   

நண்பர் மணிவண்ணன் உடன், 9 ஏப்ரல் 2017
தொடர்ந்து நான்கு மாதங்கள் கழித்து என் மனைவி திருமதி பாக்கியவதியுடன், நான் படித்த கல்லூரிக்கு அழைத்துச் செல்லும் வாய்ப்பு கிடைத்தது. கல்லூரிக் கால நினைவுகளை அவருடன் பகிர்ந்துகொண்டு மறுபடியும் கல்லூரியைச் சுற்றி வந்தேன்.
மனைவி திருமதி பாக்கியவதி உடன், 7 ஆகஸ்டு 2017
1854இல் துவங்கப்பட்ட இக்கல்லூரி பல கட்டடங்கள் பொலிவிழந்து, பல இடங்களில் செடிகள் முளைத்து பராமரிப்பின்றிப் பார்த்தபோது மனம் அதிகமாக நெகிழ்ந்தது. கும்பகோணத்திற்குப் பெருமை சேர்க்கின்ற இக்கல்லூரி புதுப்பொலிவினைக் காண்கின்ற நாளை இக்கல்லூரியின் முன்னாள் மாணவன் என்ற நிலையில், ஆவலோடு எதிர்பார்க்கிறேன்.

முந்தைய பதிவு :
காக்கப்பட வேண்டிய கலைப்பெட்டகம் : கும்பகோணம் அரசு கலைக்கல்லூரி (1)

Abstract of the article in English
As an alumnus of the more than one and half century old Government College for Men (Kumbakonam) (1975-79) I feel that many of its magnificent and aesthetic structures need to be protected.